رباعيات صلاح جاهين

رباعيات: صلاح جاهين

حاسب علي رقابيك من حبلـــــــــــها
حاسب من الأحزان و حاســـــــب لها
راح تنتهي و لابد راح تنتهــــــــــى
مش انتهت أحزان من قبلهــــــــــا؟
وعجبي !!!
يأسك و صبرك بين إيديك و أنت حر
تيأس ما تيأس الحياة راح تــــــــمر
أنا دقت مندا ومندا عجبي لقيــــــت
الصبر مر و برضك اليـأس مـــــــر
و عجبي !!!
ولدي نصحتك لما صوتي اتنبــــــــــــح
ما تخفش من جني و لا من شبـــــــــح
و أن هب فيك عفريت قتيل إسألـــــــــه
ما دافعش ليه عن نفسه يوم ما اندبح
وعجبى !!!
ولدي إليك بدل البالون ميت بالــــــون
انفخ وطرقع فيه علي كل لـــــــــــون
عساك تشوف بعينك مصيرالرجــــــال
المنفوخين في السترة و البنطلـــــون
و عجبي !!!
خوض معركتها زي جدك ما خــــاض
صالب و قالب شفتك بامتـــــــــــعاض
هي كده...ما تنولش منها الأمـــــــل
غير بعض صد ورد ووجاع مخاض
و عجبي !!!!
كام اشتغلت يا نيل في نحت الصخور
مليون بئونه و الف مليون هاــــتور
يا نيل أنا ابن حلال و من خلفتــــــك
و ليه صعيبه علي بس الأمــــــــور
و عجبي !!!

وأنا فى الضلام ...من غير شعاع يهتكه
أقف مكانى بخــــوف ولا أتركه
ولما يجى النـــور وأشوف الدروب
أحتار زياده ..أيهم أسلكه؟؟
وعجبى !!!
عجبتنى كلمه من كلام الورق
النور شرق من بين حروفها وبرق
حبيت أشيلها فى قلبى .. قالت حرام
ده انا كل قلب دخلت فيه أتحرق
وعجبى !!!

لا تجــــــبر الإنسان ولا تــــحيره
يكفيه ما فــيه من عقل بيحيره
اللى النهارده بيطلبه ويشتهيه
هوا اللى بكره حيشتهى يغيره
وعجبى !!!
الدنيا أوده كبيره للأنتظار....
فيها أبن آدم زيه زي الحمار..
الهم واحد والملل مشترك...
.ومفيش حمار بيحاول الأنتحار.
وعجبي!!!

ضريح رخام فيه السعيد اندفن
و حفره فيها الشريد من غير كفن
مريت عليهم .. قلت يا للعجب
لاتنين ريحتهم لها نفس العفن
وعجبي !! !

كان فيه زمان سحليه طول فرسخين
كهفين عيونها و خشمها بربخين
ماتت لكين الرعب لم عمره مات
مع إنه فات بدل التاريخ تاريخين
و عجبي !!!

أنا قلبى كوره ...والفراودة أكم
ياما اتنطح وانشاط ..وياما اتعكم
واقول له كله حينتهى فى الميعاد
يقول بساعتك؟ ولا بساعت الحكم؟
وعجبى!!!
قالوا الشقيق بيمص دم الشقيق...
والناس ما هياش ناس بحق وحقيق...
قلبي رميته وجبت غيرو حجر..
داب الحجر ورجعت قلبي رقيق..
وعجبي!!!

أحب أعيش ولو أعيش في الغابات..
أصحى كما ولدتني أمي وأبات..
.طائر حوان حشرة بشر بس أعيش..
ما أحلا الحيات حتى في هيئة نبات..
وعجبي!!!

سهير ليالى وياما لفيت وطفت
وف ليله كنت راجع قمت شفت
الخوف كئنه كلب سد الطريق
كنت عايز اقتله بس خفت
الارض شوك أيوه لكين هايش
والحمرة مش يعنى الطريق حايش
دى دمنا السيال . وبشره خير
أن انتى عايشه .و ان انا عايش
وعجبى!!!

غمست سنك في السواد يا قلم
علشان ما تكتب شعر يقطر ألم
مالك جرالك ايه يا مجنون..و ليه
رسمت وردة و بيت و قلم و علم
وعجبي!!!